''فوق القانون''... عندما يختبئ اللصّ في قلوبنا؟!
#نيكول-صدقة #nikolensadaka
''لا تسرق'' كبرنا واتعلمنا بالوصايا العشر، انو في وصية بتوصّينا ما نسرق، لأن السرقة من أبشع أنواع الجرايم اللي ممكن يرتكبا الإنسان، لأن اللي بيسرق بتخاف منّو الناس وبصيروا يتجنّبوا وبحاولو بكل الطرق يهربو منّو... بس هيدا ''السرّاق'' المعروف... شو يعني المعروف، يعني السرّاق اللي بيسرق ممتلكات أو اشيا منا ملكو، بِمِدّ ايدوا ع غراض غيرو وغيرا... وثُبّت عليه هيدا الجرم... ولكن؟! في ناس بترتكب أبشع أنواع الجرايم، جرايم السرقة الغامضة. جرايم ''فوق القانون'' اللي بتوجّع وبتدق بالصميم،هيدا النوع من السرقة ما بينقاس بالمال أو بالإشيا المادية.
فكّر معي للحظة!؟ كم مرّة بحياتك اتعرضت لهالنّوع من السرقة؟
-كم مرّة حبيت وعطيت من قلبك وتبادرت بالغدر والخيانة؟ هيدا اللي قدمتلو أغلى شي عندك سرق منك أحاسيسك وحبّك وقلبك وتركك بلا ولا شي وجرّدك من كل شي ومشي وخلّا ورا قلب مكسور موجوع عم ينزف ويئن...
-كم مرّة بحياتك إجا ناس ضيعولك وقتك بإشيا تافهة وبنشاطات ما بتضيف شي ع حياتك وزرعوا فيك طاقة سلبية وأخدوا منك كل طاقاتك الإيجابية.. وسرقوا منك الوقت والفرص لتحقيق احلامك وأهدافك؟!
كم مرّة تعرضت للتشهير وللحكي اللي بسيء بسمعتك أو نعتوك بصفات ما بتشبهك، ولزقوا فيك قصص وروايات من خيالن وخلو كذبتن تتصدّق؟ وسرقوا منك سمعتك وأمنك وأمانك ؟
-كم مرّة كان في ''إبليس'' عم بحوم حوليك ليفكك أسرتك ويخرب أجواء بيتك.. كم مرّة حاول يلبس توب البراءة ويحط إيطار الملايكة فوق راسو ويفوت ليلعب بالعقول الضعيفة ويسرق المحبة والحنية من قلب دارك؟!
-كم مرّة وثقت فيه واعتبرتو اغلى الناس ودخلتوا ع حياتك وهدفوا كان يسرق منك شريك عمرك وتفاصيلك الصغيرة ويجردك من كل شي؟!
-كم مرّة حاولو يسرقوا سعادتك ولحظاتك الحلوة بأخبارن اللي كلا أسى وتنمر ونميمة؟!

كم مرّة إيه كم مرّة في أفكار براسك بتحاربك وبتقلل من شأنك ومن قيمتك وبتصير تقلك انك منك نافع لاشي.. وانك منك مهم.. وانك فاشل.. وبتحاول تسرق منك اندفاعك واحلامك وطموحاتك؟! كم مرّة ما قدرت تنبسط بنجاحك لأن حاولوا يعتموا عليه ويسرقوا منك انتصاراتك وانجازاتك ، كم مرّة ما قدرت تنبسط بأكلة لوح شوكولا لأن عايروك أنو في الأغلى أطيب منّو، كم مرّة ما قدرت تفرح بتياب جديدة لابسا لأن تنمّروا عيك وقالولك وين بعدن دارجين .. كم مرّة وكم مرّة انسرق منك اكتر بكتير من اللي نقال انت وساكت لأن ما في قانون بيحمي هيك نوع سرقة خفية غامضة ، مبطنة بقالب من برا شفاف ومن جوا أسود وكلّو ظلمة...
أيمتا بدّك توعا لهالسرّاق الخطير وتحطلّوا حدّ ... وتنتبه انو وحدك قادر توقف هالشي قيل ما يسرقوا اللي باقي من حياتك وسعادتك.